Paano isusulong ng bagong Kombensiyon Bilang 193 ang disenteng trabaho sa ekonomiyang plataporma?

Ano ang Kombensiyon C193?

Ang Kombensiyon tungkol sa Disenteng Trabaho sa Ekonomiyang Plataporma, 2026 (Bilang 193), ay ang kauna-unahang pandaigdigang pamantayan sa paggawa na partikular na nakatuon sa ekonomiyang plataporma. Itinataguyod nito ang isang pandaigdigang balangkas upang matiyak na ang makabagong teknolohiya at mga bagong modelo ng negosyo ay kaakibat ng mga karapatan ng mga manggagawa, patas na kompetisyon, at napapanatiling paglago ng ekonomiya.

Bakit mahalaga ang Kombensiyong ito?

Ito ang kauna-unahang pandaigdigang balangkas para sa mundo ng trabaho na nakatuon sa ekonomiyang plataporma, at ang unang internasyonal na pamantayan na partikular na binuo upang tugunan ang epekto ng digitalisasyon sa mundo ng trabaho. Layunin nitong tiyakin na ang lahat ng mga manggagawa sa platapormang digital, anuman ang kanilang katayuan sa trabaho, ay makikinabang sa mga pangunahing karapatan at angkop na proteksiyon, habang kinikilala rin ang mga oportunidad na nilikha ng mga digital na plataporma ng paggawa. Ang Kombensiyon ay marka din ng tagumpay ng unang talakayan sa pagtatakda ng pamantayan ng ILO na nakatuon partikular sa epekto ng digital na transisyon sa mundo ng trabaho, na nagpapakita na ang mga gobyerno, mga nagpapatrabaho, at mga manggagawa ay maaaring magtulungan upang tugunan ang mga umuusbong na hamon sa pamamagitan ng panlipunang diyalogo.

Sino ang saklaw ng Kombensiyon?

Ang Kombensiyon ay nalalapat sa mga digital na plataporma ng paggawa at mga manggagawa sa digital na plataporma, maging sila ay nasa relasyong paggawa o hindi, kabilang ang mga manggagawang nagtatrabaho sa kanilang sarili o self-employed. Saklaw nito ang parehong base sa lokasyon at online na plataporma na trabaho.

Inaatasan ba ng Kombensiyon na ang lahat ng mga manggagawa sa platapormang digital ay iklasipika bilang mga empleyado?

Ang Kombensiyon ay hindi nagpapataw ng partikular na klasipikasyon ng trabaho. Sa halip, inaatasan nito ang mga Miyembrong Estado na gumawa ng mga hakbang upang matiyak na tama ang pagtukoy sa katayuan sa trabaho na pangunahing ginagabayan ng mga katotohanang may kaugnayan sa pagsasagawa ng trabaho, sa kabayaran o sahod, bukod sa iba pang mga salik, at isinasaalang-alang ang mga partikularidad ng trabaho isinasagawa sa pamamagitan ng mga digital na plataporma ng paggawa.

Ipinagbabawal ba ng Kombensiyon ang sariling pagtatrabaho o ekonomiyang plataporma?

Ang Kombensiyon ay hindi nagbabawal sa sariling negosyo o anumang partikular na modelo ng negosyo. Layunin lamang nitong tiyakin na ang mga manggagawa sa plataporma ay nagtatamasa ng angkop na mga karapatan at proteksyon anuman ang kanilang katayuan sa trabaho.

Anong mga karapatan at proteksiyon ang ibinibigay ng Kombensiyon?

Ang Kombensiyon ay tinutugunan ang malawak na hanay ng mga isyu, kabilang ang:

• Pangunahing prinsipyo at karapatan sa trabaho;
• Kaligtasan at kalusugan sa trabaho;
• Karahasan at pang-aabuso;
• Pagsusulong ng mga oportunidad para sa disenteng trabaho;
• Sahod o bayad;
• Panlipunang seguridad;
• Epekto ng paggamit ng mga automated na sistema batay sa mga algorithm sa mga manggagawa;
• Pagprotekta sa datos at privacy;
• Pagsuspinde, deaktibasyon at pagtatapos ng trabaho;
• Proteksiyon para sa mga migranteng manggagawa at refugee;
• Pag-access sa hustisya.

Ano ang sinasabi ng Kombensiyon tungkol sa mga algorithm at artipisyal na intelihensiya?

Ang Kumbensyon ay naglalaman ng mga probisyon tungkol sa epekto ng paggamit ng mga awtomatikong sistemang batay sa mga algorithm, kabilang ang mga awtomatikong sistema sa paggawa ng desisyon. Itinataguyod nito ang mga prinsipyo na may kaugnayan sa kanilang pagiging bukas, mga pananggalang, wastong paggamit, at pag-access sa mga mekanismo ng pagsusuri kapag ang mga sistemang ito ay nakakaapekto sa mga manggagawa.

Bagaman hindi tahasang binabanggit ng Kombensiyon ang artipisyal na intelihensiya (AI), ang mga probisyon nito ay naaangkop sa mga awtomatikong sistema na ginagamit sa pagsubaybay o pagsusuri ng trabaho o upang bumuo ng mga desisyong may kaugnay sa trabaho, kabilang ang mga maaaring gumamit ng mga teknolohiyang AI.

May mga probisyon ba ang Kombensiyon para sa mga migranteng manggagawa at refugee?

Ang Kombensiyon ay inaatasan ang mga Miyembrong Estado na gumawa ng mga hakbang upang maiwasan ang pang-aabuso at maprotektahan ang mga migranteng manggagawa at refugee.

Maaari bang iwasan ng mga digital na plataporma ng paggawa ang aplikasyon ng Kombensiyon sa pamamagitan ng paggamit ng mga ng mga tagapamagitan o sa kabila ng mga hangganan?

Kinilala ng Konbensyon na ang trabaho sa plataporma ay kadalasang isinasagawa sa kabila ng mga hangganan at maaaring kasangkutan ang mga tagapamagitan. Kasama rito ang mga probisyon na naglalayong tiyaking epektibong naipatutupad ang mga proteksiyon nito. Kabilang dito ang pag-aatas na ipatupad ang Kombensiyon kaugnay ng mga digital na plataporma ng paggawa, pati na rin ang mga tagapamagitan na nagpapatakbo sa kanilang teritoryo, at malinaw na tukuyin ang kani-kanilang mga responsibilidad ng mga plataporma at tagapamagitan. Dapat ding ipatupad ng mga Miyembrong Estado ang Kombensiyon kaugnay sa mga manggagawa ng digital na plataporma na nagtatrabaho sa kanilang teritoryo. Ang resolusyong pinagtibay kasama ng Kombensiyon ay binibigyang-diin na ang ilang digital na plataporma ng paggawa ay tumatakbo sa kabila ng mga hangganan, na ginagawang partikular na mahalaga ang kooperasyon sa pagitan ng mga Miyembrong Estado para sa pagpapatupad ng Kombensiyon.

Babawasan ba ng Kombensiyon ang mga umiiral na karapatan ng mga manggagawa sa digital na plataporma na kinikilalang empleyado?

Ang Kombensiyon ay hindi sa anumang paraan negatibong nakakaapekto sa mga karapatan ng mga manggagawa sa digital na plataporma na kinikilala na sa ilang mga Miyembrong Estado, kabilang ang mga itinuturing na mga empleyado. Sa halip, nagtatakda ito ng mga pananggalang sa mga usaping lalong nagiging mahalaga sa digital na ekonomiya, kabilang ang pamamahala gamit ang algorithm at proteksyon ng datos. Ang Kombensiyon ay naglalayong tiyakin na ang proteksyong ibinibigay sa mga manggagawa ng digital na plataporma ay hindi mas mababa kaysa sa ibinibigay sa ibang mga manggagawa na may parehong katayuan sa trabaho. Sa madaling salita, ang mga manggagawa sa digital na plataporma ay hindi dapat mas mababa ang proteksyon kaysa sa ibang kategorya ng mga empleyado.

Mababawasan ba ng Kombensiyon ang kakayahan umangkop ng mga Miyembrong Estado sa pangangasiwa ng mga trabaho sa platapormang digital?

Ang Kombensiyon ay hindi nilalayong bawasan o alisin ang kakayahang umangkop. Sa kabaligtaran, itinataguyod nito ang mga karaniwang prinsipyo at proteksyon habang pinananatili ang kalayaan ng mga Miyembro na magpasya kung paano nila ipatutupad ang mga probisyon nito.

Paano tinutugunan ng Kombensiyon ang impormalidad sa ekonomiyang platporma?

Ang Kombensiyon ay nalalapat sa mga manggagawa ng digital na plataporma sa parehong pormal at impormal na ekonomiya. Kinilala nito na ang mga digital na plataporma ng paggawa ay maaaring lumikha ng mga daan patungo sa pormalisasyon at kinakailangan ang mga Miyembrong Estado ay magsagawa ng mga angkop na hakbang upang mapadali ang pormalisasyon ng mga trabahong isinasagawa sa pamamagitan ng mga digital na plataporma ng paggawa, kabilang ang pagpaparehistro ng mga manggagawang nagtatrabaho sa kanilang sarili o self-employed.

Ang iba pang mga probisyon ay maaari ring sumuporta sa pormalisasyon sa pamamagitan ng pagtataguyod ng pagiging bukas, pagpapadali ng pag-access sa panlipunang seguridad, pagsuporta sa pagtukoy ng katayuan sa trabaho, at pagpapalakas ng implementasyon at pagpapatupad. Ang Kombensiyon ay hindi nagtatakda ng isang natatanging modelo ng pormalisasyon. Ang mga Miyembrong Estado ay may kalayaan sa pagpili ng mga hakbang na kanilang ipinatutupad alinsunod sa pambansang batas at kasanayan.

Agad bang ipatutupad ang Kombensiyon sa lahat ng Miyembrong Estado?

Tulad ng lahat ng mga Kombensiyon ng ILO, ang Kombensiyon Blg. 193 ay nagiging legal na obligasyon lamang para sa mga Miyembrong Estado na ratipikahan ito. Kapag niratipikahan na, ito ay dapat ipatupad sa pamamagitan ng mga pambansang batas, regulasyon, patakaran, kolektibong kasunduan o iba pang mga hakbang, alinsunod sa legal na sistema at pambansang kasanayan ng bawat bansa. Kahit bago pa man ang ratipikasyon, ang Kombensiyon ay maaaring magbigay ng mahalagang patnubay sa patakaran para sa mga gobyerno, mga nagpapatrabaho, mga manggagawa, at mga digital na plataporma ng paggawa.

Anong kasunod na hakbang ang kinakailangan mula sa mga Miyembrong Estado?

Sa ilalim ng Artikulo 19 ng Konstitusyon ng ILO, kinakailangan ng lahat ng Miyembrong Estado na dalhin ang atensyon sa mga bagong pinagtibay na mga Kombensiyon at Rekomendasyon sa mga may-kaukulang awtoridad para sa pagpapatupad ng batas o iba pang aksyon.