Molawana wa tiro wa ILO ka ga HIV/AIDS le lefatshe la tiro

HIV/AIDS ke matshosetsi a magolo mo lefatsheng la tiro: e ama karolo e e tlhagisang thata ya badiri le go fokotsa dituelo, mme e gapeletsa dikgwebo ditshenyegelo tse dikgolo mo makaleng otlhe ka go fokotsega ga ntshodikuno, go oketsa ditshenyegelo tsa badiri le go latlhegelwa ke bokgoni le maitemogelo. Mo godimo ga moo, HIV/AIDS e ama ditshwanelo tsa motheo kwa tirong, bogolosegolo mabapi le go tlhaola le go nyatsa badiri le batho ba ba tshelang le go amiwa ke HIV/AIDS.

Leroborobo le ditlamorago tsa lona di itaya thata ditlhopha tse di mo kotsing go akaretsa basadi le bana, ka jalo di oketsa go tlhoka tekatekano ga bong go go leng teng le go gakatsa bothata jwa go dirisa bana. Ke ka moo ILO e ikemiseditseng go dira polelo e e nonofileng ka molawana wa tiro ka ga HIV/AIDS le lefatshe la tiro. Molao o tla nna botlhokwa mo go thuseng go thibela go anama ga leroborobo leno, go fokotsa ditlamorago tsa lone mo badiring le mo malapeng a bona le go tlamela ka tshireletso ya loago go thusa go samagana le bolwetse jono. E akaretsa melawana ya botlhokwa, jaaka go lemoga HIV/AIDS jaaka kgang ya mo tirong, go se kgethololwe mo tirong, tekatekano ya bong, go tlhatlhoba le go boloka sephiri, dipuisano tsa loago, thibelo le tlhokomelo le tshegetso, jaaka motheo wa go samagana le leroborobo mo tirong.