EU-ILO nia projetu Kompetensia Agrofloresta Aumenta abilidade Treinadór Negósiu sira-nian liuhosi Kursu Refresher SIYB

Dili, Timor-Leste (ILO News) – Projetu Kompetensia Agrofloresta ba Empregu no Resiliénsia husi EU, liuhosi parsería ho UNDP no IADE, kompleta Treinamentu ba Treinadór sira (ToT) kona-ba programa Refresher Start and Improve Your Business (SIYB) ba treinadór negósiu sira husi IADE. Treinamentu ne'e mak fasilita husi Master Trainer ILO no Co-Trainer iha eskritóriu nasional IADE, ho objetivu atu fortifika partisipante sira-nia komprensaun kona-ba konseptu negósiu prinsipál, atualiza ho estratéjia foun sira, no aumenta sira-nia kompetensia iha jestaun negósiu.

IADE uza ona módul SIYB—desenvolve husi ILO durante tinan 10. SIYB uza ona iha nasaun liu 100 no módul formasaun SIYB agora iha Master Trainer hamutuk 400+, treinadór hamutuk 55,000+, organizasaun parceira hamutuk 10,000+, inkluí IADE iha Timor-Leste, no kontínua involve. Treinamentu ida-ne'e ho objetivu atu refresh koñesimentu treinadór sira kona-ba SIYB no fó informasaun atualizadu kona-ba modul negósiu foun.

Treinamentu refresher ida-ne'e halao durante loron lima hodi aborda tópiku foun sira, inklui atualizasaun iha programa SIYB, kustu, marketing, preparasaun ba micro-teaching, planu finansiéru, no treinadór sira-nia kompetensia. Master Trainer Rini Wahyu Hariyani husi Indonézia enkoraza partisipante sira atu aplika koñesimentu foun ne'ebé sira hetan hodi suporta empresa lokál sira no kria oportunidade servisu verde liuhosi kadéia de valór agrofloresta iha Timor-Leste. “Hau espera treinadór sira bele kontínua atualiza koñesimentu negósiu no referénsia sira tuir tendência no dezenvolvimentu, nu’ne’e disemina konesimentu ne’e ba emprendedór sira iha Timor-Leste,” dehan Rini.

© ILO

© ILO

Partisipante sira haksolok tebes hodi apresia treinamentu ne'e, katak simu nia impaktu pozitivu ba sira-nia kresimentu profisionál. Lívia Maia do Rosário Ximenes, nu’udar partisipante husi treinamentu ne’e , sublinha oinsá kursu ne'e ajuda refresh sora-nia koñesimentu, partikularmente iha área kustu no planu. "Treinamentu ida-ne'e refresh fali hau-nia konfiança no kompetensia, liuliu iha área hanesan kustu no planu," Lívia hateten, hanesan mos nia hakarak atu partilha nia kompetensia ho emprendedór lokál sira iha munisípiu Baucau.

Partisipante seluk, Ivo Inocencio Jacob Alecrim, treinadór negósiu iha IADE-Ainaro, sublinha valor hosi kursu ida-ne'e bele aumenta nia eksperiénsia iha planu finansiéru. "Planu finansiéru mak tópiku ida ne'ebé importante liu ba hau. Ida ne’e sei ajuda tebes asiste kliente negósiu sira kona-ba presu, kalkulasaun kustu, no estratéjia marketing ba produtu agrofloresta," Ivo dehan. Nia fiar katak treinamentu refresher ne'e sei aumenta signifikantemente nia servisu lor-loron hodi apoiu empresa lokál sira.
Treinamentu ne'e konklui liuhosi entrega sertifikadu ba partisipante sira. Nu’udar afirmasaun hodi aktualiza sira-nia ekspertíza iha programa SIYB. Ho abilidade sira ne'e, treinadór negósiu husi IADE preparadu ona hodi fó apoiu ba emprendedór lokál sira iha munisípiu sira hotu, ajuda sira ultrapasa dezafiu atual no hadia dezempenhu negósiu iha promosaun produtu agrofloresta hanesan nu’u, vanilla, no kakau iha Timor-Leste.