Feto nia empoderamentu
Bainhira inan ida aprende, família sai buras
Evangelinha Mafalda da Silva, inan mesak ida hosi Tiriloka, Baucau, hetan abilidade foun ba futuru ida ne’ebé di’ak liu ba nia família liuhosi programa formasaun mina-nuu virjen ne’ebé fornese hosi Projetu Abilidade Agrofloresta ba Empregu no Reziliénsia, ne’ebé implementa hosi OIT no finansia hosi Uniaun Europeia (EU).
7 May 2025
BAUCAU, Timor-Leste (Notísia OIT) - Evangelinha Mafalda da Silva, ho idade 32 hosi Tiriloka, Baucau, nu’udar inan mesak ida ne’ebé mak badinas no sempre iha mehi atu fornese moris di’ak ba nia família. Ho rekursu finanseiru ne'ebé mak limitadu, nia hasoru dezafiu barak hodi suporta edukasaun no nesesidade loroloron nian ba nia oan na'in haat. Bainhira nia rona kona-ba Treinamentu Mina-nu Virjen ne’ebé oferese hosi CDC – Baucau iha Abril 2025, nia haree oportunidade ida atu muda ninia família nia futuru.
Halo balansu ba responsabilidade família nian enkuantu aprende abilidade foun sira la'ós fásil ba Evangelinha. Nia tenke hadeer sedu hodi prepara hahán ba nia oan sira molok tuir formasaun. Maibé, nia determinasaun halo nia la'o nafatin. Nia hatene katak hetan abilidade foun sira bele ajuda nia harii futuru ida ne'ebé mak di'ak liu ba nia família. Iha primeiru, Evangelinha duvida ba nia-an rasik. Nia nunka halo mina-nuu virjen antes. Maibé ho orientasaun ne’ebé mak pasiensia hosi treinadór sira no enkorajamentu hosi nia grupu, nia konfiansa hahú buras. Nia aprende oinsá atu produz mina-nuu virjen ho kualidade aas.
Agora, Evangelinha iha objetivu foun ida atu hahú nia negósiu ki'ik rasik iha grupu ida nia laran. Nia iha esperansa atu produz no fa'an mina-nu virjen hodi kria rendimentu ne'ebé estável ba nia família. Alende ne'e, nia hakarak inspira inan sira seluk atu fiar iha sira-nia an rasik no aproveita oportunidade hodi buras.“Ha’u agradese tebes ba formasaun ne’e,” nia hateten hodi refere ba oportunidade ne’ebé mak hetan hosi CDC - Baucau liuhosi Projetu Abilidade Agrofloresta, ne’ebé implementa hosi Organizasaun Internasionál Traballu (OIT) no finansia hosi Uniaun Europeia (UE). "Ida-ne'e fó esperansa mai ha'u atu harii moris ida ne'ebé di'ak liu ba ha'u nia oan sira."
Evangelinha nia istória mak forsa no esperansa nian. Liuhosi formasaun no apoiu sira, nia hetan ona abilidade no konfiansa. Nia jornada hatudu katak ho determinasaun no apoiu ne'ebé loos, inan hotu bele nakfilak dezafiu sira ba oportunidade ba nia família.
Ha’u agradese tebes ba formasaun ne’e... Ida-ne'e fó esperansa mai ha'u atu harii moris ida ne'ebé di'ak liu ba ha'u nia oan sira
Related content
Feto nia lideransa
Maria nia jornada lideransa: Lori mudansa no hametin komunidade sira
Dezenvolvimentu abilidade
“Ha’u nia vizaun ba futuru mak kooperativa sira iha Timor-Leste sai metin liután”