“Хөдөлмөрийн аюулгүй байдал, эрүүл мэндийн сарын аян”-ийг Хөдөлмөр, нийгмийн хамгааллын яам, Нийгмийн даатгалын ерөнхий газар, Хөдөлмөрийн аюулгүй байдал, эрүүл мэндийн төв, Монголын үйлдвэрчний эвлэлийн холбоо, Монголын ажил олгогч эздийн нэгдсэн холбоо зэрэг нийгмийн түншлэгч талууд хамтран 12 дахь жилдээ зохион байгуулж байна. 2023 оны хувьд Олон улсын хөдөлмөрийн байгууллага (ОУХБ) уг аяныг Европын Холбооны санхүүжилттэй НҮБ-ын Хөгжлийн Хөтөлбөр, НҮБ-ын Хүнс, хөдөө аж ахуйн байгууллага, ОУХБ-ын хамтран хэрэгжүүлж буй “ТХЗ-уудтай уялдсан төсвийн төлөвлөлтөөр хөдөлмөр эрхлэлтийг дэмжих” төслийн хүрээнд зохистой хөдөлмөр эрхлэлтийг дэмжих зорилтын хүрээнд гурван талт оролцогч байгууллагуудтай хамтран зохион байгуулж байна.

2022 оны 6 дугаар сард болсон Олон улсын хөдөлмөрийн Бага хурлаар "Хөдөлмөрийн аюулгүй байдал, эрүүл мэнд" (ХАБЭМ)-ийн асуудлыг Хөдөлмөрийн хүрээний суурь зарчим, эрхэд багтаахаар шийдвэрлэсэнтэй холбогдуулан ОУХБ-ын “Хөдөлмөрийн аюулгүй байдал, эрүүл мэндийн тухай” 155 дугаар конвенц, “Хөдөлмөрийн аюулгүй байдал, эрүүл мэндийг дэмжих тогтолцооны тухай” 187 дугаар конвенцыг ОУХБ-ын суурь конвенц гэж тунхагласан билээ. Үүнтэй холбогдуулан, энэ жилийн “Хөдөлмөрийн аюулгүй байдал, эрүүл мэндийн сарын аян”-ийг “ЭРҮҮЛ АЮУЛГҮЙ АЖИЛ-БИДНИЙ СУУРЬ ЭРХ” гэсэн уриатайгаар тэмдэглэж байна.

Аяны гол зорилго нь эрүүл, аюулгүй ажиллах эерэг соёлыг олон нийтэд төлөвшүүлэх зорилгоор олон нийтийн хөдөлмөрийн аюулгүй байдал, эрүүл мэндийн талаарх ойлголт, хандлагыг дээшлүүлэхэд чиглэсэн нөлөөллийн ажлуудыг хэрэгжүүлэхээр төлөвлөсөн. Нөлөөллийн ажлын хүрээнд “Хөдөлмөрийн аюулгүй байдал, эрүүл мэндийн сарын аян” нээлтийн арга хэмжээ, Уул уурхай, Барилга, Эрчим хүч, Аж үйлдвэр гэх зэрэг эрсдэл өндөртэй салбаруудын ажилчдад чиглэсэн фото чалленж, хүүхдийн гар зургийн уралдааныг зохион байгуулахаас гадна ХАБЭМ-ын талаарх хоёр видеог хийж олон нийтэд түгээнэ.

Cарын аяны нээлтийн арга хэмжээ

Энэ хүрээнд 2023 оны 4 сарын 4-ний өдөр Монголын үйлдвэрчний эвлэлийн соёлын төв ордонд сарын аяны нээлтийн арга хэмжээг зохион байгууллаа.

Тус нээлтийн арга хэмжээг ХНХ-ын дэд сайд, ХАБЭА-н Үндэсний хорооны дарга С.Зулпхар нээж хэлсэн үгэндээ, үйлдвэрлэлийн орчин нөхцөлийг сайжруулах, ажилтныг ажлын байран дахь осол, мэргэжлээс шалтгаалсан өвчлөл болон бусад эрсдэлт хүчин зүйлийн нөлөөллөөс хамгаалах, урьдчилан сэргийлэх, ажлын байрны соёлыг төлөвшүүлэхэд төрийн болон төрийн бус байгууллагуудыг татан оролцуулах тэдний сайн туршлагыг олон нийтэд түгээн дэлгэрүүлэхэд сарын аяны зорилго оршиж байгааг онцлов.

Нээлтийн арга хэмжээнд МҮЭ-ийн холбооны Ерөнхийлөгч С.Эрдэнэбат, ОУХБ-ын БНХАУ, Монгол улсыг хариуцсан товчооны захирал Чангхи Ли нар үг хэлж Монгол Улсад ХАБЭА-н хүрээнд тулгамдаж буй асуудал, гарц шийдэл, олон улсын ХАБЭА-н хэм хэмжээ түүний сайн туршлагын талаар танилцуулав.

Нээлтийн ажиллагааны үеэр (ХАБЭМ)-ийн чиглэлээр үйл ажиллагаа явуулдаг аж ахуй нэгж байгууллагуудын танилцуулга үзэсгэлэн өдөрлөг зохион байгуулагдаж, “ХАБЭА-н сарын аян-2023” хүрээнд хэрэгжүүлэх арга хэмжээний танилцуулгыг Хөдөлмөрийн аюулгүй байдал эрүүл мэндийн төвийн дарга М.Даваабат, Мэргэжлийн хяналтын чиг үүргийн шилжилт ба салбарын хяналтын талаар ХНХЯ-ны Салбарын хяналтын газрын даргын үүргийг түр орлон гүйцэтгэгч Б.Нарангарав, Эрүүл, аюулгүй ажлын байрны суурь эрхийг хангахад нийгмийн түншүүдийн манлайлал оролцооны тухай МҮЭ-ийн холбооны ЕНБД, ХАБЭА-н Үндэсний хорооны гишүүн Х.Буянжаргал, Эрүүл аюулгүй ажлын байр ба ажил олгогчийн үүрэг хариуцлага сэдвээр МАОЭНХ-ны ХАБЭА-н асуудал хариуцсан Зөвлөх Г.Эрдэнэтөгс, Сургалтын байгууллагын чиг хандлага хэрэгцээ шаардлагын талаар “Ололт амжилтын түлхүүр” ХХК-ний гүйцэтгэх захирал Б.Батхүү нар мэдээлэл хийлээ.