Estratéjia empregu
Timor-Leste avansa ninia Estratejia Nasionál ba Empregu ho planu implementasaun no monitorizasaun ne'ebé komprensivu
OIT suporta planu implementasaun no monitorizasaun ba Estratejia Nasionál Empregu Timor-Leste nian atu mellora kuantidade no kualidade empregu nasaun nian.
12 March 2025
DILI, Timor-Leste (Notísia OIT) - Sorumutu dahuluk atu atualiza implementasaun no monitorizasaun ba Estratejia Nasionál Empregu Timor-Leste nian (ENE) 2017-2030 marka kompromisu signifikativu nasaun nian atu hametin kriasaun empregu no dezenvolvimentu ekonómiku iha nasaun ne'e. Organiza husi Sekretariadu Estratejia Nasionál Empregu iha Sekretaria Estadu Formasaun Profisional no Empregu (SEFOPE), ho apoiu husi OIT, iha Dili, iha loron 6 fulan Marsu, sorumutu ne'e halibur partisipante 70 resin, inklui reprezentante sira husi liña ministeriu, parseiru sosiál no ajénsia formasaun vokasionál sira hodi hadi'a planu implementasaun no monitorizasaun estratéjia nian.
Aprova husi Konsellu Ministrus tuir Rezolusaun Nu. 44/2017 iha 13 Juñu 2017, ENE 2017-2030 identifika limitasaun prinsipál sira ba kresimentu empregu no esplika asaun estratéjika sira atu mellora kuantidade no kualidade empregu iha Timor-Leste. Estratéjia ne'e harii iha pilár prinsipál tolu: Aumenta demanda Merkadu Traballu, Hadia Fornesimentu Merkadu Traballu no Haforsa Instituisaun Merkadu Traballu.
Sorumutu ida-ne'e, nu'udar parte husi grupu servisu tékniku interministerial ne'ebé estabelese iha ENE nia okos, sai hanesan pasu importante ida hodi atualiza planu implementasaun no monitorizasaun. Prosesu atualizasaun sei inkorpora idea nasionál no define medida konkreta sira ba tinan hirak oin mai, aliña planu ho Planu Estratéjiku Dezenvolvimentu Nasionál Timor-Leste nian no prioridade emerjente sira hanesan adaptasaun ba mudansa klimátika, adezaun ba ASEAN no transformasaun dijitál sira.
Sorumutu ida-ne'e hanesan pasu importante ida hodi asegura katak ita-nia estratéjia empregu nafatin responsivu ba nesesidade merkadu no prioridade nasionál sira.
Rogerio Araujo Mendonca, Sekretariu Estadu Profisionál no Empregu
Sekretáriu Estadu Profisionál no Empregu no Diretor Nasionál OIT nian ba Indonézia no Timor-Leste loke sorumutu ne'e ho liafuan furak, hodi subliña nesesidade atu atualiza ENE hodi responde ba paizajen merkadu traballu ne'ebé evolve.
"Sorumutu ida-ne'e nu'udar pasu importante ida hodi asegura katak ita-nia estratéjia empregu nafatin responsivu ba nesesidade merkadu no prioridade nasionál sira," dehan Rogerio Araujo Mendonca, Sekretariu Estadu Profisionál no Empregu; enkuantu Simrin Singh, Diretor Nasionál OIT nian ba Indonézia no Timor-Leste, "hodi promove aprosimasaun kolaborativu ida, ita bele kria oportunidade empregu sustentavel no haforsa Timor-Leste nia forsa-traballu ba futuru."
Sorumutu ne'e lidera husi Diego Rei, Espesialista Empregu, Esplika enkuadramentu atu atualiza planu implementasaun no monitorizasaun ENE nian. Tuir mai diskusaun grupu ne'ebé fasilita husi Paulo Alves, Diretór Ezekutivu Sekretariadu ENE, hamutuk ho ofisiál seniór SEFOPE sira.
Sorumutu ne'e remata ho estabelesimentu baze ba reforsu planu implementasaun ENE nian atu aliña ho objetivu dezenvolvimentu nasionál sira, nune'e mós konsolidasaun idea sira hodi finaliza revizaun enkuadramentu ENE nian.