EU, ILO no TradeInvest Timor-Leste Tau Forsa Hamutuk Hodi Suporta Dezenvolvimentu Setór Privadu liuhosi Treinamentu Negósiu no Komérsiu Exportasaun ba Produtu Agroflorestal

DILI, Timor-Leste (ILO News) – União Europeia (EU), Organizasaun Internasionál ba Traballu (ILO), no TradeInvest Timor-Leste tau forsa hamutuk atu suporta kresimentu no dezenvolvimentu setór privadu iha Timor-Leste. Kolaborasaun ida-ne'e parte husi Projetu Kompetensia Agrofloresta ba Empregu no Resiliénsia, inisiativa ne’e hetan suporta fundu husi EU, ho objetivu atu aumenta produtividade, abilidade negósiu, no komérsiu exportasaun iha setór agrofloresta iha nasaun.

Programa treinamentu intensivu durante loron rua ne’e, atu fasilita empresáriu setór privadu ho abilidade ne'ebé nesesáriu hodi tama iha merkadu internasionál atu kompete no hetan susesu. Fo énfase espesífiku ba produtu agrofloresta, treinamentu ne'e aborda tópiku importante barak, inklui identifika no asesu merkadu eksportasaun, kumpre padraun qualidade internasionál no sertifikasaun ne'ebé presiza atu asesu merkadu EU, no halo orientasaun ba komplesidade prosedimentu eksportasaun.

ILO, liuhosi Projetu abilidade Agrofloresta husi EU, kometidu hodi suporta dezenvolvimentu setór privadu iha Timor-Leste liuhosi Cadeia de Valor agrofloresta.

Richard Hanson, Jestaun Programa ba Projetu kompetensia Agrofloresta ba Empregu no Resiliénsia

Merkadu eksportasaun ba produtu agrofloresta mak parte vital husi estratéjia ekonomia Timor-Leste, oferese oportunidade ba negósiu lokál atu espande sai liu husi fronteira doméstika no asesu globál ba bens no servisu sira. Envolvimentu iha komérsiu eksportasaun la'ós de'it fó kresimentu no diversifikasaun ekonomia, maibé mos fortifika pozisaun nasaun iha merkadu globál, fó vantagem kompetitivu ba negósiu sira.

Meske ho oportunidade hirak ne'e, negósiu barak iha Timor-Leste enfrenta dezafiu signifikante iha parte eksportasaun ba sira-nia bens no servisu sira. Desafiu hirak ne'e inklui difikuldade atu identifika merkadu eksportasaun ne'ebé viável, kumpre padraun qualidade internasionál ne'ebé rigorozu, no falta koñesimentu kona-ba prosedimentu no rekerimentu exportasaun. Inisiativa treinamentu ne'e responde diretamente ba problema hirak ne'e, oferese solusaun prátika no exersísiu ho esperiensia direta atu ajuda partisipante sira hakat liu husi dezafius hirak ne'e.

Eng. Arcanjo da Silva, Diretor Ekzekutivu husi TradeInvest Timor-Leste, reforsa importánsia husi treinamentu ida-ne'e, hateten katak, "Setór agrofloresta Timor-Leste iha potensiál boot ba eksportasaun, maibé ema-nia empresa sira presiza abilidade no koñesimentu ne'ebé di'ak atu orienta komplesidade komérsiu internasionál. Treinamentu ida-ne'e mak pasu importante ida atu empodera setór privadu atu bele kompete iha merkadu Globál."

Richard Hanson, Jestaun Programa ba Projetu kompetensia Agrofloresta ba Empregu no Resiliénsia, fahe mos hanoin ida-ne'e, hodi dehan, "ILO, liuhosi Projetu abilidade Agrofloresta husi EU, kometidu hodi suporta dezenvolvimentu setór privadu iha Timor-Leste liuhosi Cadeia de Valor agrofloresta."

Susana Martins, Team Leader ba Delegasaun EU iha Timor-Leste, hatutan, "União Europeia haksolok hodi suporta inisiativa sira-ne'ebé lori dezenvolvimentu ekonomiku sustentável iha Timor-Leste. Liuhosi investe ba abilidade no koñesimentu husi empresa lokál sira, ami ajuda atu kria ekonomia ne'ebé properiu, resiliente no sustentável."

Esforsu hamutuk ida-ne'e mak sublinha komitmentu husi EU, ILO, no TradeInvest Timor-Leste atu hala'o dezenvolvimentu ekonomiku sustentável no asegura katak produtu agrofloresta Timor-Leste nian atinje potensiál hotu-hotu iha merkadu internasionál.

Informasaun Jerál

Projetu Kompetensia Agrofloresta ba Empregu no Resiliénsia hetan suporta finansiál husi Uniaun Europeia (EU). Projetu ida-ne'e dura tinan haat, hahú iha Setembru 2023. Totál orsamentu millaun 5.9 euro, Projetu ida-ne'e ho objetivu atu promove diversifikasaun ekonomi ne'ebé verde no sustentável no resiliénsia iha Timor-Leste liuhosi dezenvolvimentu setór privadu, edukasaun téniku no profisionál (TVET) ba integrasaun juventude iha merkadu traballu no atu aumenta oportunidade ba empregu ho qualidade no Emprendedorismo, partikularmente ba joven feto no labarik-feto sira.

Ba informasaun liutan, kontaktu:
Paul Pinto
Communications & Information Officer for ILO's Agroforestry Project
[email protected]