Empodera feto no foin-sa'e rurál sira iha Timor-Leste liuhosi unidade formasaun movel

DILI, Timor-Leste (Notísia OIT) - Delegasaun Uniaun Europeia (UE) entrega ona unidade formasaun movel rua ba projetu "Abilidade Agroflorestál ba Empregu no Reziliensia UE", ne'ebé finansia husi Uniaun Europeia no implementa husi Organizasaun Internasionál Traballu (OIT), ne'ebé sei uza ba atividade formasaun iha komunidade rurál sira iha Timor-Leste. Iha Dili, iha loron 5 Marsu, Unidade Formasaun Movel simu husi Simrin Singh, Diretora Nasionál OIT Indonézia no Timor-Leste.

Unidade formasaun movel hirak-ne'e sei implementa no hala'o iha área rurál sira, hodi oferese formasaun importante ba feto rurál no foin-sa'e sira kona-ba prátika agroflorestál sustentavel sira. Inisiativa ida-ne'e ho objetivu atu fó apoiu ba ekonomia verde no sirkular, hodi fasilita integrasaun grupu sira-ne'e ba merkadu traballu, hodi hasa'e sira-nia independénsia no reziliensia ekonómika. Aprosimasaun ida-ne'e la'ós de'it apoia protesaun ambientál maibé mós hasa'e viabilidade ekonómika empreza agroflorestál sira-nian

"Iha unidade formasaun movel sira-ne'e sei fó oportunidade ba feto no foin-sa'e sira iha área rurál atu hasa'e sira-nia abilidade no hetan koñesimentu esensiál iha produsaun agroflorestál, no ikusmai hadi'a sira-nia kondisaun moris. Ida ne'e aliña ho aprosimasaun sentru umanu OIT nian, ne'ebé subliña aprendizajen durante moris tomak atu rezolve taxa dezempregu ne'ebé aas, enkuantu fó kbiit ba feto sira atu hetan asesu di'ak liu ba empregu no oportunidade ekonómiku sira," Simrin dehan.

Maizumenus porsentu 70 husi populasaun rurál Timor-Leste nian depende ba agrikultura, ai-laran no animál-hakiak ba sira-nia moris. Atu apoia komunidade hirak-ne'e, Projetu Abilidade Agroflorestál ba Empregu no Reziliensia ho objetivu atu hasa'e sira-nia kualidade moris liuhusi fornese abilidade esensiál ba produsaun agroflorestál. Ho foku partikulár ba feto no foin-sa'e sira, programa ne'e buka atu rezolve taxa dezempregu foin-sa'e sira ne'ebé aas no falta kualifikasaun traballu iha área rurál sira.