“Ha’u ajuda ha’u-nia inan fa’an modo antes no depois eskola hodi sustenta ami-nia família“

Sei dadeer-saan iha Kuarentena Tasi-Tolu, Dili, Timor-Leste. Elizino de Deus, tinan 9, okupadu ona hodi ajuda nia inan hodi fa'an modo oioin hanesan kanko, brinzela, mostarda no tomate ba merkadu lokál.

Ha'u orgullu tebes ho Elizino ne'ebé ajuda ha'u ho badinas. Se ha'u bele hili, ha'u hakarak nia atu hela iha uma ho nia maun-alin sira hodi estuda no halimar.

Tereza Silva Santos, Elizino nia inan

Depois nia aman hakotu iis iha tinan balun liu ba, Elizino nu’udar oan boot hola ona responsabilidade ajuda nia inan hodi sustenta sira nia família desde ki’ik kedas. Nia ba merkadu loron-loron husi tuku 06.00 dader to’o nia ba eskola iha tuku 10.00 dader.

“Iha loron eskola, ha'u tau ha'u nia farda no livru sira iha ha'u nia pasta laran. “Ha’u nia inan fo osan USD 0.50 to’o dolar 1 ne’ebé ha’u bele uza iha eskola,” nia dehan.

Wainhira nia remata eskola iha tuku 01.30 loraik, nia mai fali iha merkadu hodi kontinua ajuda nia inan fa’an modo to’o tuku 07.00 kalan. “Ha’u ajuda ha’u-nia inan antes no depois eskola atu sustenta ami-nia família. "Ha'u sempre koko atu estuda no halimar uitoan ho ha'u nia maun-alin sira molok toba," dehan Elizio.

© Paqhar Malay/ILO

© Paqhar Malay/ILO

Maski ho kondisaun moris neʼebé susar, Elizino bele mantein valór diʼak iha eskola. Nia mestre sira apresia ona nia eskola nia realizasaun sira no nia hetan klasifikasaun daruak iha klase datoluk iha tinan kotuk. "Ha'u agora estudante kuartu ano no ha'u nia profesór sira apresia ha'u nia atinzimentu sira iha eskola," nia hatete ho hamnasa.

Tereza Silva Santos, Elizino nia inan, hateten nu’udar inan ba oan na’in tolu, nia tenke sustenta nia oan sira hafoin nia la’en mate. Nia deside atu buka moris hodi fa’an modo bainhira nia hetan mikro kréditu husi banku hodi hahú nia negósiu ki’ik.

“Ha'u sente hakmatek bainhira ha'u hetan empréstimu ki'ik ne'e. Ha'u uza empréstimu hodi sosa modo sira no fa'an fali iha merkadu lokál. Ha'u orgullu tebes ho Elizino ne'ebé ajuda ha'u ho badinas. Se ha'u bele hili, ha'u hakarak nia atu hela iha uma ho nia maun-alin sira hodi estuda no halimar," nia hatete.

Maibé, realidade ko'alia oin seluk. “Ha’u labele serbisu mesak tanba ami laiha kios iha merkadu. "Nune'e, ami tenke fa'an modo sira iha merkadu nian iha estrada ninin no Elizino ajuda ha'u ho fa'an no tau matan ba seguransa sira," akresenta Tereza.

Ba futuru, nia espera katak nia bele hetan espasu permanente iha merkadu atu nune’e nia bele fa’an modo sira ne’e lahó interupsaun ruma no bele hetan rendimentu barak liután. “Ho rendimentu ne’ebé barak liu, ha’u bele kontinua haruka ha’u nia oan sira ba eskola atu nune’e sira bele atinje sira nia mehi hanesan Elizino ne’ebé iha mehi boot atu sai polísia bainhira nia sai boot,” nia dezeja.