Ami nia impaktu, sira nia lian
Alberto nia Misaun atu Hakbiit Nia Komunidade
Treinadór ida hosi Timor-Leste buka hakbi’it ninia komunidade kona-ba sistema agrikultura ne’ebé sustentável tuir ninia formasaun ho Projetu Abilidade Agrofloresta, ne’ebé finansia hosi Uniaun Europeia no implementa hosi OIT.
20 February 2025
BAUCAU, Timor-Leste (Notísia OIT) - Alberto Guterres, tinan 39, treinadór hosi Viqueque, Timor-Leste, sempre fiar iha kbiit agrikultura nian bele muda moris. Maibé, dala barak nia haree agrikultór sira serbisu maka’as - estraga subprodutu nuu nian ne'ebé mak iha valór, fa'an nuu matak sira ho folin ne'ebé baratu, no laiha koñesimentu kona-ba prátika agrikultura ne'ebé sustentável.
Ho determinasaun atu halo diferensa, Alberto tuir Formasaun ba Formadór sira (ToT) kona-ba Mina Nuu, Hahan Animal nian, no Adubu Orgániku, la'os de'it atu hadi'a nia abilidade rasik, maibé atu lori mudansa loloos ba nia komunidade.
Liuhosi formasaun refere, Alberto hetan ona koñesimentu tékniku no abilidade lideransa nian ne’ebé sei permite nia atu halo mina-nuu virjen (VCO) ho kualidade aas no hanorin ema seluk atu produz no fa'an, transforma lixu/foer nuu nian sai ai-han ba animál no adubu orgániku, hodi hamenus lixu/foer to'os nian no fó treinu ba agrikultór sira kona-ba téknika prosesamentu nuu nian ne'ebé mak sustentável no lukrativu.
Bainhira Alberto kompleta formasaun, nia sei la rai de'it abilidade sira ne’e ba nia an rasik. Nia sei fó formasaun no ajuda agrikultór sira iha suku atu aprende maneira di'ak liu atu uza nuu, hasa'e sira nia rendimentu, no kria sistema agrikultura ne'ebé sustentável liu. Nia planu inklui organiza sesaun formasaun komunitária ba grupu kooperativa, agrikultór no juventude no mos halo advokasia ba prátika agríkola sustentável sira ne'ebé hadi'a meius subsisténsia no ambiente.
“Ha'u la'ós aprende de'it ba ha'u-nia an rasik. Ha'u aprende mos ba ha'u nia komunidade. Ha'u hakarak ajuda ema seluk atu haree katak nuu ne’e laos aihun de'it —sira bele sai fonte oportunidade nian.” – Alberto Guterres. Nia mós apresia ba Projetu Abilidade Agrofloresta, ne’ebé finansia hosi Uniaun Europeia no implementa hosi Organizasaun Internasionál Traballu nian, ba oportunidade hodi hetan formasaun ne’e.
Ho treinadór hanesan Alberto ne’ebé hakat ba oin, Timor-Leste nia agrikultór sira iha dalan ba futuru ida ne’ebé lukrativu no sustentável liu. Matenek ne’ebé nia fahe, sei fó kbiit ba ema seluk atu transforma sira-nia to’os no hadi’a sira-nia moris.