Lansamentu Estratejia Nasional Empregu (ENE) Promove Oportunidade Empregu no Hamenus Dezempregu iha Timor-Leste

Iha loron 17 Jullu 2017, Sekretariu Estadu ba Politika Formasaun Professional no Empregu (SEPFOPE) liu husi kolaborasaun hamutuk ho Ministru Estadu Koordenador Asuntu Ekonomiku (MECAE) no Organizasaun Mundial ba Trabalho (International Labour Organization /ILO) halo lansamentu ba programa Estratejia Nasional Empregu (ENE) ba periodu 2017 – 2030 iha salaun Suai, edifisio Timor-Plaza, Dili. Iha programa Lansamentu ne’e konvida mos linha Ministerial sira seluk ne’ebe sei sai nudar responsavel ba iha implementasaun programa estratejia ENE ne’e nian hodi asina kuadru lembransa lansamentu programa ENE ba periodu 2017-2030.

Press release | Dili, Timor-Leste | 17 July 2017
DILI (Komunikadu Impresa Konjutu) - Iha loron 17 Jullu 2017, Sekretariu Estadu ba Politika Formasaun Professional no Empregu (SEPFOPE) liu husi kolaborasaun hamutuk ho Ministru Estadu Koordenador Asuntu Ekonomiku (MECAE) no Organizasaun Mundial ba Trabalho (International Labour Organization /ILO) halo lansamentu ba programa Estratejia Nasional Empregu (ENE) ba periodu 2017 – 2030 iha salaun Suai, edifisio Timor-Plaza, Dili. Iha programa Lansamentu ne’e konvida mos linha Ministerial sira seluk ne’ebe sei sai nudar responsavel ba iha implementasaun programa estratejia ENE ne’e nian hodi asina kuadru lembransa lansamentu programa ENE ba periodu 2017-2030.

Objetivu fundamentu husi programa Estratejia Nasional Empregu 2017-2030 ne’e nian maka atu kria oportunidade empregu ba foinsae Timor oan sira nebe nia idade konsidera pronto ona atu tama ba iha merkadu trabalho hodi buka serbisu no atu ha’metin liu tan mos kampo empregu hirak nebe existe ona ba foin sae no Timor oan sira ne’ebe hetan ona serbisu iha merkado trabalho, hodi nune’e bele ha’menus numeru dezempregu iha Timor-Leste laran no mos tulun ha’kbi’it produtividade no kresimentu ekonomia Timor Leste ninian.

Atu realiza objetivu ida ne’e, Programa estratejia ENE ne’e rasik define ona pilares 3 ne’ebe persija implementa Pillares tolu nebe refere mak hanesan haktuir mai ne’e:

Pilares ba da’huluk nian mak hasa’e demanda ba merkado trabalhu liu husi promove empregu ne’e be kria husi setor privadu, hasae empregu migrasaun laboral, masimiza impaktu ba despeza publika iha empregu no dezenvolve potensialidade lokal.

Pilares ba da’ruak nian mak hametin oferta ba merkadu trabalhu liu husi dezenvolve rekursu umanu, kontinua implementa Planu ba programa Edukasaun no Formasaun Teknika Profisional Timor-Leste nian (TVET 2011-2030), kria ligasaun linha Ministerial nebe forte entre Ministeriu Edukasaun (ME) ho SEPFOPE, ha’metin no ha’buras programa sentru formasaun sira, hametin programa Ensinu Superior sira, hadia sistema protesaun sosial no promove igualdade jeneru.

Pilares da’tolu nian mak hametin instituisaun sira ne’ebe iha relasaun serbisu ho merkadu trabalhu. Atu hametin instituisaun sira ne’e, persija hametin politika ativa iha merkadu de trabalhu, hametin estrutura linha koordenasaun Ministerial sira ninian, hametin Sistema Informasaun Merkadu Trabalhu (SIMT), hadia ligasaun entre prokura do empregu ka sistema buka serbisu nian ho oportunidade demande de empregu no reve’e hikas fali lei traballu no mekanismu fixa salariu ne'ebe uza iha Timor-Leste.

Sua Exselensia Ministru Estadu Koordenador ba Asuntu Ekonomiku, Eng. Estanislau Aleixo da Silva hateten katak “Hasa’e kapasidade rekursu umanu hodi promove empregu sustentavel, liu-liu ba foin sae sira sai hanesan objetivu importante no prioridade fundamental husi VI Governu Konstitusional hodi realiza kresimentu ekonomia. Aliende ne’e, sai mos hanesan objektivu importante ida ne’ebe define ona iha Governu nia matadalan ba reforma no fomentu ekonomiku (GRFE), ne’e hateten katak atu hasa’e kresimentu ekonomia persija halo reforma ba regulamentu laboral no dezenvolve kapasidade forsa trabalhu. Tamba ne’e, MECAE sei kontinua koordena hamutuk ho SEPFOPE no ILO hodi dezenvolve programa estratejia ida ne’e”.

Sua Exselensia Sekretariu Estadu ba Politika Formasaun Professional no Empregu, Sr. Ilidio Ximenes da Costa hato’o katak “Ho realizasaun, implementasaun no komitmentu liu husi lansamentu ba Programa ENE iha loron ohin Segunda 17 Julho 2017, Governo ho nia kbi’it persistensia tomak sei hahu kria kondisaun ho hanoin innovativu foun hodi bele kontinua fasilita oportunidade empregu foun no ha’metin diak liu tan oportunidade empregu nebe existe ona ba Timor oan sira hotu inklui ha’belar no ha’forsa programa formasaun vokasional ho kualidade nebe alinha tuir demande requerimentu merkadu trabalho no nesesidade industria lokal no regional ninian atu nune’e bele tulun ha’kb’iit produtividade no sustentabilidade kompetitivu ekonomia Timor Leste ninian ba prosperiedade povo tomak iha nasaun Timor Leste nia laran”.

Representante Organizasaun Mundial ba Trabalho ou ILO, Sra. Michiko Miyamoto haktuir mos katak: “Empregu hanesan dalan ida kritiku atu atinje kresimentu ne’ebe bele hasae moris diak ema kiak sira nian. Empregu produtivu no traballu dignu mak sai hanesan meius prinsipal atu hasai povu husi kiak. Partisipasaun forsa Traballu nebe menus no difikuldade ba foinsa’e sira atu tama iha merkadu traballu mak sai deficiensia boot ida. Estratejia Empregu Nasional 2017-2030 fornese estratejia ida atu governu no sosiedade sivil tau atensaun maka’as no ligado liu tan iha empregu no sei uza hanesan enkudramentu ida hodi fo atensaun makas ba iha espectro politico emprego.”

Estratejia Nasional Empregu ne’e aprova ona husi Konselhu Ministru iha loron 13 Junhu 2017 ho rezolusaun do Governu no. 44/2017 de 20 de Julho 2017.

Lansamentu konvida mos linha ministerial ne’ebe responsavel ba implementasaun ENE hodi asina kuadru lembransa lansamentu ba implementasaun ENE 2017-2030. Linha ministerial hirak ne’e mak hanesan: Ministru Estadu, Koordenadór Asuntu Ekonómiku (MECAE), Ministériu Finansas (MF), Ministériu Solidariedade Sosiál (MSS), Ministériu Komérsiu, Indústria no Ambiente (MCIA), Ministériu Edukasaun (ME), Ministru Turzimu, Artes no Kultura (MTAC), Ministériu Obras Públikas, Transportes no Komunikasaun (MTAC), Ministériu Planeamentu no Investimentu Estratéjiku (MPIE), Sekretáriu Estadu ba Polítika Formasaun Profisionál no Empregu (SEPFOPE), Sekretária Estadu ba Apoiu no Promosaun Sósiu-Ekonómika ba Feto, Sekretáriu Estadu Juventude no Desportu (SEJD), TradeInvest Timor-Leste no Agensia Dezenvolvimentu Nasional.